MUNINGU WAMPA MU AFELIKA DIAKATI
NDOMBE SIKAMA!

Mu mvu wa 1969 Mpeve ya Tata Nzambi'a Mpungu yayiza sikamesa Ne Muanda Nsemi ye kum'bieka mu kala Nlongi'a Kongo Ne Makandala, ovo Ntuadisi a Nkangu'a Kongo mu kinsuni ye mu kimpeve mu tandu kiaki kia nsilulu za Kongo.
Kua Ne Muanda Nsemi, Tata Nzambi wavana bisalu ebi:

1. Sikamesa Nkangu'a Kongo, ye vutula wo mu Nzil'a Kongo, mu Kimpeve ye mu Kinsuni.

2. Tunga lufulu lua Kongo diampa, ye yonzeka Bakongo babo ku nsia luyalu lumosi.

3. Vutula Kanda dia Kongo va kiandu kia nzitusu, ye kitula dio Muinda una sikamesa Bandombe ye kienzola Nza yamvimba.

4. Soneka Makaba(Makongo), i Nkand'a Kinzambi kia Kongo, kina vana kua Bakongo Ntemo wu bana nata mu Nza.

5. Kubika Bana ba Ne Kongo, kidivo bakala balunga mu kika ye yala bitembo bina nata Tandu kia Kinatimasa ki tuakotele.

Mu diambu dia sala kisalu kiaki, kia 3-7-1969, Ne Muanda Nsemi wavanga Bundu dia Kongo.

Bundu dia Kongo i Nsaku, Mpanzu ye Nzinga bamene bundana ye yonzama mu muita umosi. Salu kia Bundu dia Kongo i mu tuadisa Nkangu'a Kongo mu nzil'a nkudulu mu Mpeve ye ntomosono a zingu kieto kia kinsuni ye kimpeve. Mu malongi meto mu Bundu dia Kongo:

1. Tulonganga bantu beto mu vutula Tata Nzambi'a Mpungu Tulendo(Ne Muanda Kongo) ye Bakulu beto va kiandu kia nzitusu.
Tulonganga bantu beto malongi manata Ntumua za kisi Kongo, zafidisa Tata Nzambi'a Mpungu ku Kongo.

2. Tulonganga nsilulu zasila Tata Nzambi'a Mpungu kua beto Bakongo.

3. Tulonganga bingana biavana Tata Nzambi'a Mpungu kua Bakulu ba Kongo dia Ntotela.

4. Tulnganga nkalasani zena va kati kua muntu ye Tata Nzambi, ye Bisimbi, ye Bakulu bandi.

5. Tulonganga bantu beto mu sambela tata Nzambi'a Mpungu, ye kum'sambelela mu nkalasani ya biza ye Simbi kia Kongo, ye Bakulu ba Kongo banunga mu mpeve, ye Bisimbi biatula Tata Nzambi'a Mpungu mu tiya, mu mupepe, mu maza, ye mu ntoto mia beto Bakongo.

6. Tulonganga bantu beto NSIKU WANLONGO WA BUKONGO(= la Loi sacréé) wa nkudulu mu Mpeve mu diambu dia mpulusu a miela mia bantu beto.

7. Tulonganga kinkulu kia KONGO DIA NTOTELA ye kikongo kiavana Tata Nzambi'a Mpungu kua beto Bakongo.

8. Tulonganga kua Makesa ma Bundu dia Kongo keti nki tufuete vanga beto Bakongo, kidivo kanda dia Kongo diakatuka ku nsia KINKOLE kianata banzenza ku Kongo.

9. Tulonganga bantu beto malongi mana kutunata mu baka Kimpuanza kia luyalu, Kimpuanza kia kimpeve ye Kimpuanza kia lusalu.

MVULUZI MIA KANDA DIETO

Tata Nzambi wavanga makanda mampila mu mpila ma bantu. Dionso kanda dia bantu ye yau Mbasi(Simbi kia Kanda diodio), ye yau ndinga, ye yau nsi, ye yau nsibafua, ye miau mintinu, ye bau Bakulu, ye zau Ntumua zabafidisa Tata Nzambi mu kuiza kubatuadisa, kubakatula mu mpasi, isavo kubavulusa, mu kuiza kubavutula mu nzila yambote, ye kubanatina tezo kiampa kia ntemo watandu kiampa. I bonso bobo Tata Nzambi kafidisila Mfumu Nsaku, Ne Mbemba Zulu, Nkulu Isanusi, Mama Mbangala, Nimi a Lukeni I, Ne Kodi Puanga, Ne Mbakala Nzondo,Ne Nkembo Wamonesua, Nimi a Likeni II, Mama Lemba, Mama Mafuta,Mama Vita Kimpa, Mbuta Buta, Ne Mbianda Ngunga, Mfumu Kimbangu, Mbuta Filipo Mbumba, Mbuta Matai Muanda, Mbuta Matsua, Mbuta Mpadi, ye b.b. kua Bakongo.

BIVANGUA