Makaba

NKAND'A KINZAMBI KIA KONGO

MAKONGO / MAKABA

NKANDA WANLONGO WA BUKONGO

Tuka mbandu ye zimbandu, Bakongo batambasiananga nsamu wantoko beni wa Tata Nzambi'a Mpungu mu nzil'a bimoko. Mu mvu wa 1969 Simbi kia Kanda dia Kongo wayiza monekena Ne Muanda Nsemi ye kum'lomba mu soneka nsamu wau.Mu lusadusu lua Mpeve ya Tata Nzambi'a Mpungu, Ne Muanda Nsemi wasoneka kinkulu kiaki kia kanda dia Kongo ye masomo mama mamonsono mavaikisi nkanda wau weti bikua vo: MAKONGO evo MAKABA.

Lusansu lua Kongo lulonganga dio vo,mu tandu kia nkulu, Bana ba Zulu evo Bana ba Ne Kongo, bafidusua vava ntoto mu natina Bana ba ntoto ntemo wa Se dieto dimosi diena mu mazulu. Bu bamanisa kisalu kiau, Bana baba ba Zulu bavutukisa ku batuka.
Tekela benda, bau basala vana kua nkulu Na Lukengo, tadi dimosi dia kinganga, diena ye lendo kia soba muntu wankulu ye kun'kitula se muntu wampa. Sengua kiampamba ye kitula kio se wola.
Tadi diadi diena diandombe, kadi Ndombe i tinta ya Mpeve yanene yilundanga mansueki ma luyalungunu lua zulu ye ntoto, mu kinsuni ye mu kimpeve.
Idina, ku nim'a Ngue Ntangu yimonekanga, kuenina Ngue Ntangu yandombe,yilembi monekanga,yampeve, yena nlundi'a mansueki mampeve, ye mpe nto yantete ya ntemo usienangua kua Ngue Ntangu yampembe, Ngue Ntangu yimonekanga.
Idina, Bangudi Zanganga bavovelanga vo Tata Nzambi wena Ndombe, kansi ntemo andi wena wampembe.
Idina, mu mayonzo(Sport) ma Karate ye mamingi mankaka, muntu sundidi mu nzailu, ndiona zeye mansueki mamingi, uvuatanga mukaba wandombe.
Idina, va fulu kianlongo ku Mekka venina tadi dianlongo diandombe.
Mu lusansu lua Kongo, Tadi diadi dianlongo, diandombe, dibikuanga vo MAKONGO. Idina, nkanda wanlongo wa Kinzambi kia Kongo ubikuanga vo MAKONGO.
Kadi mu nkanda wau muena Lusansu luampeve, luena ye lendo kia vilula muntu wankulu(kisengua kiampamba)ye kun'kitula se muntu wampa(wola). mu kimpeve.

BIELA BIA MAKONGO

Mu Makongo muena kumi ye minkanda miole emi: Kinsemi, Makaba, Mpova, Maniema, Bangunza, Muanda, Sikama, Mbila, Bavita, Mazayu, Milandu, ye Mavanga. Nkanda-nkanda wena wavambesua mu bikapu . Konso kapu kivuidi bitini.

Kinkulu kiena mu Makongo kieti yantikila mu nsemono a Nzila Zombo. Mboki mueti vovelua Ngue Ntangu, nsemono a Nzalowa eto yayi, ngiz'a Ngonda, nsemono a muntu vava ntoto, ngiz'a Bana ba Zulu. Landila diodio, mueti vovelua Nkuk'a nlangu.
Nkanda wau wanlongo weti vovela kuayingi beni luzingu lua Bandombe mu Ngipiti yankulu, ye ngialuka za Bandombe ba ntela miazangama tuka ku node dia Afelika nate ku sude dia ngunsi. Mboki Makongo meti vovila Zimbabue diankulu, mpiok'a Bakongo mu nsi yankatu ya Kalahari, ntungulu a Kongo dia Ntotela, luzingu mu nsi ya Kongo tekela ngiz'a mindele, malongi ma kimpeve ma ngunza za Kongo zantama, ... ye bonso bobo.

Nkembo, nkembo, nkembo kua Batata ba Mpungu Tulendo!

BDK-2007